Taifa Stars imebebwa na mashabiki - Himid Mao

Nahodha Msaidizi wa Timu ya Taifa 'Taifa Stars' Himid Mao, amesema wingi wa mashabiki kwenye mchezo wao dhidi ya Uganda, uliwapa mzuka wa kupambana hadi kuibuka na ushindi Uwanja wa Taifa juzi. 

Himid alisema kuwa hata wachezaji ambao hawakupata nafasi ya kucheza mechi hiyo ya kuwania kufuzu fainali za Mataifa ya Afrika (Afcon) nchini Misri Juni, mwaka huu, kila mmoja alikuwa na hamasa kuona wanashinda kwenye mchezo huo muhimu. 

"Mimi niwashukuru sana mashabiki, wingi wao uwanjani na shangwe walizokuwa wanapiga zilitufanya kupambana kuhakikisha tunapata ushindi," alisema Himid. 

Aidha, alisema walikuwa na kila sababu ya kushinda mchezo huo ili kufikia mipango yao ya kucheza fainali za Afrika, jambo ambalo wamelitekeleza kwa vitendo. 

"Tunashukuru tumefanikiwa kufuzu fainali za Afrika, kila mmoja ndoto yake ilikuwa kuona tunafuzu kwa fainali hizi kwa sababu hatujashiriki kwa miaka mingi sana," aliongeza kusema Himid.

Stars iliibuka na ushindi wa mabao 3-0 dhidi ya Uganda, hivyo kufikisha pointi nane na kuungana na Uganda kufuzu kwenye fainali hizo za Afrika wakitokea kwenye Kundi L lililokuwa pia na timu za Lesotho na Cape Verde. 

Hiyo ni mara ya kwanza Stars kufuzu fainali hizo tangu mwaka 1980 iliposhiriki michuano hiyo nchini Nigeria.